Inspektoriati i Kontrollit dhe Mbrojtjes së Territorit prishi mësngjesin e sotëm 5 objekte në zonën e Astirit, të cilat preken nga projekti i Unazës së Re.
Aksioni me mjete te rënda e fadroma zgjati rreth 4 orë, duke përfunduar me rrafshimin e 5 objekteve. Ato ishin kryesisht ndërtesa me dy e tre kate, për të cilat nuk pati rezistencë nga banorët.
Gjatë gjithë aksionit, rruga ishte e bllokuar për mjetet dhe kalimtarët për çështje sigurie.
Ndërkohë IKMT bëri të ditur se nesër do të prishë edhe një objekt 6 katësh me anë të një shpërthimi të kontrolluar.
Autoritetet thanë se ky aksion i hap rrugë ndërtimit të Unazës për të cilën tashmë janë shpallur edhe firmat fituese. Ndërkohë opozita ka denoncuar në prokurori tenderat e mëparshëm, për të cilat nuk ka ende rezultate.