Prokuroria e Krimeve të Rënda ka dhënë këtë të enjte, pretencën për ish-prokurorin e Krujës Haxhi Giu, duke kërkuar dënimin e tij me 4 vite burg. Giu nuk ishte i pranishëm në seancë gjatë kërkesës së Prokurorisë, ku e njëjta gjykatë më herët kishte vendosur të aplikonte gjykimin e shkurtuar për 57-vjeçarin. Ish-prokuroria akuzohet për korrupsion. Ai njihet edhe si hetuesi i vrasjes së Azem Hajdarit në vitin 1998. Në seancat e mëparshme, Haxhi Giu, kërkoi të lirohej me argumentin se kishte probleme shëndetësore, e përballë kësaj kërkese gjykata caktoi një grup ekspertësh. Akuza ka kërkuar gjithashtu që Giu të mos ushtrojë profesionin e vet për 3 vite. Provat kryesore të Prokurorisë së Krimeve të Rënda janë përgjimet telefonike. Sipas akuzës, ish-prokurori ka kërkuar një shume parash për të lehtësuar dënimin ndaj nje te akuzuari per trafik droge. Prokuroria kërkoi dënimin me dy vite burg edhe per Aleks Shporin, i cili i kishte dhënë Giut 10 mije euro.
