Presidenti Biden u drejtohet udhëheqësve të vendeve të NATO-s, thekson mbështetjen e hekurt për aleancën

Presidenti Joe Biden iu drejtua udhëheqësve të vendeve të NATO-s gjatë fjalimit të tij në samitin  që po mbahet  në Uashington, duke vënë në pah unitetin e aleancës kundër agresionit rus në Ukrainë.

“Ne jemi në gjendje  ta pengojmë agresionin  dhe të mbrojmë  territorin e NATO-s në çdo fushë: tokë, ajër,  det, hapësirë. Miqtë e mi  është mirë që të jemi më të fortë se kurrë, sepse ky moment  në histori kërkon forcë kolektive. Në  Evropë lufta  e agresionit  e Putinit vazhdon dhe Putini nuk dëshiron asgjë më pak se nënshtrimin total  të Ukrainës për t’i dhënë fund demokracisë së  Ukrainës”, tha Biden.

Biden  sqaroi planet për t’i ofruar Ukrainës  ndihma të reja ushtarake.

“Sot  shpall dhurimin historik të pajisjeve të mbrojtjes ajrore për Ukrainën. Shtetet e Bashkuara, Gjermania, Holanda, Rumania dhe Italia do t’i ofrojnë Ukrainës pajisjet për pesë sisteme shtesë strategjike të mbrojtjes ajrore. Dhe në muajt e ardhshëm, Shtetet e Bashkuara dhe partnerët tanë synojnë t’i ofrojnë Ukrainës dhjetëra sisteme shtesë të mbrojtjes ajrore taktike”, shtoi ai.

Ndërkohe presidenti ukrainas Volodymir Zelensky kërkoi veprim të shpejtë nga aleanca dhe SHBA-ja në veçanti.

“Bota është e aftë t’i bëjë gjerat e duhura, kur ne  të gjithë veprojmë mjaftueshëm të fortë, mjaftueshëm të vendosur. Dhe kjo duhet të jetë strategjia jonë, pikërisht kjo dhe pikërisht tani, me gjithë fuqinë amerikane që  asnjë Putin mund ta zmbrapsë”, tha Zelensky.

Në takimin e NATO-s në Uashington marrin pjesë udhëheqësit e 32 vendeve anëtare të aleancës dhe partnere si Australia, Japonia, Zelanda e Re dhe Koreja e Jugut, si dhe Ukraina. /vizionplus.tv