Presidenti i vendit, Bajram Begaj ka dekretuar ligjin “për rivlerësimin e pasurisë së paluajtshme”.
Dekreti mban datën 6 janar 2026. Ky hap u jep mundësi qytetarëve që përgjatë vitit 2026 të rivlerësojnë pronën e tyre duke paguar një normë tatimore tre herë më të ulët, nga 15% në 5%.
Tatimi 5% do të aplikohet mbi diferencën mes vlerës së regjistruar të pronës dhe asaj të re në treg.
Pra, nëse një apartament ka vlerë të regjistruar 100 mijë euro, ndërsa në treg vlera ka arritur në 150 mijë euro, tatimi do të paguhet për diferencën prej 50 mijë eurosh.
Qytetarët mund të ndjekin dy rrugë: ose të bëjnë rivlerësim me çmimet referuese në treg, ose të kontaktojnë një agjent për të marrë një raport vlerësimi për çmimin real që prona e tij mund të ketë në treg.
Gjatë kësaj fushate, do të njihet edhe amortizimi i pronës, duke paguar normë tatimore më të ulët se 5% për pronat më të vjetra. Ndërkohë, për pronat e legalizuara, vlera që do të merret parasysh do të jetë ajo në momentin e legalizimit.
