Krerët e politikës uruan mësuesit për festën e 7 Marsit këtë të diel. Presidenti Ilir Meta zgjodhi të ndalet në Korçë, për të nderuar me dekorata disa mësues dhe pedagogë të shquar korçarë.
“Jemi sot për ti shprehur mirënjohjen e thellë të gjithë mësuesve, edukatorëve, pedagogë për kontributin. Kujtojmë plejadën e mësuesve që jetën e tyre ia kushtuan edukimit të brezit të ri. të gjithë mësuesit tanë, sidomos ato në shkollat rurale, meritojnë mbështetje më të madhe. Të rinjtë fatkeqësisht kanë qenë të detyruar të largohen nga vendi. Ndaj duhet të bëjmë më shumë që rinia jonë ta ndërtojë këtu të ardhmen e saj në vendin tonë të mrekullueshëm. Profesioni i mësuesit është shumë fisnik. Kemi kaq shumë mësues të thjeshtë që sakrifikojnë pavarësisht vështirësive që ndeshim”, tha Ilir Meta.
Kryeministri Edi Rama nga ana tjetër e bëri urimin e tij në “Facebook”, ku midis të tjerash tha se më e mira për mësuesit nuk ka ardhur akoma.
“Një urim nga zemra për të gjithë mësuesit e Shqipërisë, ata në pension e ata që në krye të detyrës po kalojnë një vit tejet të vështirë, duke i siguruar krejt ata se më e mira është ende përpara nesh.”
Një urim erdhi nga krerët e opozitës, Lulzim Basha e Monika Kryemadhi. Basha zgjodhi të urojë me anë të një fotoje me vajzën e tij, ndërsa Kryemadhi shprehu mirënjohjen për mësuesit.
Edhe ministrja e Arsimit, Evis Kushi uroi Ditën e Mësuesit, përmesi një kolazhi urimesh e falenderimesh nga nxënës të shkollave të ndryshme të vendit, pjesë e së cilës është edhe vetë.
