Policia kërkon të ruajë aeroportin e Rinasit

Kur ka kaluar më shumë se një javë nga supergrabitja e Aeroportit të Rinasit, ku u morën afërsisht 1 milion euro, mesditën e kësaj të premte u mbajt mbledhja e parë për kushtet e sigurisë së jashtme e te brendshme të aeroportit. Në mbledhjen e drejtuar nga kreu i Aviacionit Civil, Aleksandër Lipivani, morën pjesë edhe Zëvendësministri i Transporteve, Drejtori i Përgjithshëm i Policisë Haki Çako, ai i Kufirt Genc Merepeza, si dhe Drejtori Ekzekutiv i Aeroportit, Rolf Castro Vasquez. Për drejtuesit më të lartë të policisë, grabitja në aeroportin “Nënë Tereza” ka ngritur shumë pikëpyetje mbi sigurinë e kombëtare. Ne keto kushte, ata kane kërkuar edhe rishikimin e kushteve të kontratës të nënshkruar me kompaninë e sigurisë “ICTS”. Por, në përfundim të mbledhjes, asnjë nga pjesëmarrësit nuk ka pranuar të bëjë publike se çfarë është diskutuar me argumentin se cenohet siguria kombëtare.