Policia e Shtetit konfirmoi përmes një deklarate zyrtare se Gledis Nano ka pezulluar menjëherë nga detyra oficeren e Policisë, nënkomisare Anisa Kostani.
Mendimet dhe opinionet personale të punonjësve të Policisë nuk përfaqësojnë në asnjë rrethanë, mendimet dhe opinionet e organizatës së Policisë së Shtetit, thuhet mes të tjerash në komunikate.
Numri një i policisë ka urdhëruar Drejtorinë e Standardeve Profesionale në Drejtorinë e Përgjithshme të Policisë së Shtetit për të nisur hetimin disiplinor ndaj kësaj oficereje.
Reagimi i policisë vjen pak orë pasi nënkomisarja Anisa Kostani ofendoi rëndë përmes një statusi në rrjetet sociale, gazetarët e kronikës në lidhje në lidhje me mënyrën sesi kishin raportuar vrasjen e Madrit Ulqinakut dy netë më parë në këtë qytet.
Reagimi i Policisë së Shtetit
Me keqardhje ndoqëm reagimin aspak etik dhe profesional të një oficereje të Policisë së Drejtorisë Vendore të Policisë Elbasan, e cila nëpërmjet një postimi në rrjetet sociale ka fyer gazetarët, me pretendimin se gazetarët po përbaltin punën e Drejtorisë Vendore të Policisë Elbasan.
Përsa më sipër, Drejtori i Përgjithshëm i Policisë së Shtetit Gledis Nano ka pezulluar menjëherë nga detyra oficeren e Policisë, Nënkomisare Anisa Kostani dhe ka urdhëruar Drejtorinë e Standardeve Profesionale në Drejtorinë e Përgjithshme të Policisë së Shtetit për të nisur hetimin disiplinor ndaj kësaj oficereje, për shkelje të rëndë të Rregullores së Policisë së Shtetit, miratuar me VKM nr. 750 datë 16.09.2015, konkretisht të nenit 209, pika 1 “Shkelja e rëndë e atributeve/kompetencave të policisë pa ndonjë arsye bindëse, nuk i përmbush apo dështon në përmbushjen e detyrave dhe përgjegjësive të caktuara, të cilat kanë shkaktuar pasoja të rënda në kryerjen e detyrave”.
Sqarojmë opinionin publik se mendimet dhe opinionet personale të punonjësve të Policisë nuk përfaqësojnë në asnjë rrethanë, mendimet dhe opinionet e organizatës së Policisë së Shtetit, e cila ka një sektor të posaçëm, përmes të cilit komunikon zyrtarisht me median dhe publikun.
Policia e Shtetit është e bindur dhe e vendosur për të krijuar një marrëdhënie partneriteti dhe oponence me median, bazuar në respektin reciprok dhe në të vërtetën.
Policia e Shtetit falënderon gazetarët për punën e tyre në drejtim të informimit të publikut në lidhje me veprimtarinë e organizatës së Policisë së Shtetit dhe kërkon mirëkuptimin e tyre që raste sporadike të mos cënojnë marrëdhëniet korrekte mes gazetarëve dhe Policisë së Shtetit.
Sali Berisha e shfrytëzoi bashkëbisedimin e të premtes me gazetarët për të akuzuar qeverinën në lidhje me situatën e rendit dhe sigurisë në vend.
Lideri demokrat tha se 4 viktimat e orëve të fundit tregojnë se bandat dhe krimi kontrollojnë sot Shqiperinë.
Sipas tij, projekti i Ramës për “Pasaportën e Artë” nuk është gjë tjetër vecse një thirrje për kriminelet” Bashkohemi në Shqiperi”.
Berisha: ‘Pasaporta e artë’, një thirrje e Ramës për të bashkuar kriminelet e botës në Shqipëri
Jam sot për të deklaruar në emër të PD, se pasaporta e artë e Edi Ramës është thjesht një thirrje: “narko-trafikant dhe kriminel të të gjithë rajonit, Evropës dhe botës bashkohuni në Shqipëri”. PD deklaron se pas nisjes për legalizimin e kanabisit, ligjin për amnistinë fiskale, legalizimin e parave të krimit që hyjnë nga jashtë, pasaporta e artë është mekanizmi i tretë e i fundit i trinomit të shndërrimit të Shqipërisë në parajsën tokësore të drogës trafiqeve dhe krimit rajonal evropian dhe botëror. Pasaporta e artë, në vendet ku shteti ligjor funksionon është një mundësi e përdorur nga ato qeveri dhe vende për të thithur investime të huaja. Kurse pasaporta e artë në narko-shtetin e parë dhe të vetëm në Evropë, Shqipëri, është kanal i zi për të larë narko-eurot e trafikantëve të pashpirtë të rajonit, Evropës e botës në Shqipëri, një kanal i zi për paranë toksike të bosëve të drogës dhe krimit, para e cila me kullat monumente nacionaliste korruptive si i ka quajtur shtypi ndërkombëtar në Tiranë po shkatërron pamjen, urbanistikën trafikun e mjedisin e saj”
“Kjo qeveri do të marrë atë që meriton. Ne si opozitë do të jemi këtu cdo ditë për të denoncuar të gjitha afërat e kësaj qeverie”, tha Berisha.
Ai shtoi se në 9 vitet e fundit në vendin tonë nuk ka ardhur asnjë biznesmen I huaj për investim cka dëshmon klimenn e rëndë të biznesit në Shqiperi.
