Shtetet e Bashkuara të Amerikës dërgojnë një mesazh të drejtpërdrejtë nga Tirana: krimi i organizuar dhe trafiku i narkotikëve nuk do të tolerohen dhe Shqipëria mbetet një front kyç në këtë betejë.
Gjatë ceremonisë së mbylljes së trajnimit për hetuesit e SPAK dhe BKH dhe FBI, e ngarkuara me punë e ambasadës amerikane në Shqipëri, Nancy VanHorn theksoi se rrjetet kriminale, përfshirë edhe ato shqiptare, përbëjnë sot kërcënim të drejtpërdrejt për sigurinë kombëtare të Shteteve të Bashkuara dhe për stabilitetin e vendeve aleate, përfshirë edhe Shqipërinë.
“Rrjetet kriminale, përfshirë grupet shqiptare që bashkëpunojnë me kartelet e Amerikës Latine të përmendura nga sekretari Rubio, përbëjnë kërcënime të konsiderueshme për sigurinë dhe përparimin ekonomik të Shqipërisë përmes aktiviteteve si trafiku i drogës dhe pastrimi i parave. Sikurse e keni parë përmes këtij kursi, këto krime po mundësohen nga teknologjitë moderne.”
Zyrtarja amerikane konfirmoi se lufta kundër rrjeteve kriminale është një prioritet strategjik për Uashingtonin.
“Kur presidenti Trump bëri thirrje për eliminimin e plotë të krimit të organizuar ndërkombëtar, ai nënvizoi se këta kriminelë përdorin sjellje “të ndërlikuara të përshtatjes”, duke krijuar kërcënime të pazakonta dhe në zhvillim për sigurinë tonë kombëtare. Dhe siç tha sekretari Rubio, organizatat ndërkombëtare kriminale dhe terroriste, veçanërisht ato të angazhuara në trafikimin e narkotikëve, janë kërcënimi më i madh për sigurinë e Shteteve të Bashkuara në hemisferën perëndimore, ku këto grupe po destabilizojnë shtet-kombet dhe po i çojnë në emigrim masiv. Ne do të ndjekim me këmbëngulje prioritetet e presidentit Trump në Shqipëri, duke forcuar institucionet që luftojnë krimin e organizuar dhe trafikun e narkotikëve si SPAK, BKH dhe Akademia e Sigurisë.”
Sipas Nancy VanHorn, trajnimi i hetuesve të SPAK dhe BKH nga FBI ka siguruar për ta mjete të reja hetimore dhe aftësi analitike për të shfrytëzuar të dhënat celulare në hetimet penale. Në këtë mënyrë, shtoi VanHorn, do të ketë më shumë ndjekje penale dhe dënime më të forta të pjesëtarëve të krimit të organizuar.
