Që prej mesnatës të së martës rreth 300 qytetarë nga Kosova janë bllokuar në Serbi, në pikë kalimin kufitar me Kroacinë. Lajmin e bëri të ditur sekretari i zyrës ndërlidhëse të Kosovës në Serbi Fatmir Haxholli nëpërmjet një statusi në rrjete sociale. Sipas tij e gjitha është një hakmarrje për votimin në favor të Kosovës në Asamblenë Parlamentare të Këshillit të Evropës .
“Në hakmarrje dhe nervozizëm absurd ndaj votimit të Asamblesë Parlamentare të Këshillit të Evropës për anëtarësimin e Republikës së Kosovës në këtë institucion ndërkombëtar, autoritetet kufitare të Serbisë në pikëkalimin Serbi – Kroaci nga mesnata po i mbajnë të bllokuar së paku katër autobus me targa dhe udhëtarë, qytetarë të Republikës së Kosovës”, tha Haxholli.
Lexo edhe :
Related Posts
Ndër të tjera Haxholli theksoi se autoritetet serbe iu kanë marrë pasaportat dhe dokumentacionet e udhëtimit qytetarëve kosovarë, ndërsa e cilësoi shkelje flagrante të marrëveshjeve të arritura në kuadër të dialogut për normalizimin e marrëdhënieve mes dy vendeve.
“Bllokimi i mbi rreth 300 qytetarëve është shkelje flagrante jo vetëm e marrëveshjeve të Brukselit, por edhe e të drejtave universale të njeriut të garantuara me të gjitha konventat ndërkombëtare. Vetëm regjimet autoritare i bllokojnë udhëtarët e një vendi tjetër me shpjegimin se ky është një urdhër nga Beogradi”, tha Haxholli.
Një ditë më parë Kosova mori dritën jeshile nga Asambleja Parlamentare e Këshillit të Evropës për të vijuar rrugën e anëtarësimit në këtë organizatë, por kjo nuk u prit aspak mirë nga Beogradi. Ministri i jashtëm i Serbisë Ivica Daçiç e quajti votimin pro Kosovës një veprim të turpshëm të Asamblesë.
/vizionplus.tv