Presidenti Ilir Meta deklaroi se ditët në vijim qytetarët do të njihen me përmbajtjen e planit të tij për mbrojtjen e votës së lirë. Këtë deklaratë, ai e bëri nga sheshi “Nënë Tereza”, ku kërkoi shpalljen e lumit Vjosa “Park Kombëtar”, ndërsa e quajti një trashëgimi jo vetëm kombëtare, por evropiane.
Kreu i shtetit iu bëri thirrje mes të tjerash partive politike që të propozojnë njerëz me integritet dhe të bëjnë fushatë evropiane.
“Se ç’përmban ky plan do të njiheni në ditët në vijim. Çdo shqiptar i ndershëm dhe patriot pavarësisht bindjeve partiake është 100% dakord me Presidentin e Republikës që nuk duhet të vihet më dorë mbi votën sepse prandaj jemi në këtë situatë kaq të rëndë, që udhëheqim në nivel botëror për shpopullimin e vendit, pikërisht se niveli i lirisë së zgjedhjeve është katandisur në këtë situatë që e dini ju dhe që e di gjithë bota. Është një kusht i pakapërcueshëm nga BE për çeljen e negociatave. Të gjithë të mbajnë duart larg nga votat, të kontribuojnë për një fushatë civile dhe europiane, të gjithë të paraqesin alternativat e tyre. Është një gjë e mirë se përveç forcave politike keni mundësi të shpreheni dhe për kandidatin që preferoni duke dhënë një mesazh të qartë që drejtuesit e partive duhet të promovojnë njerëz me integritet që të respektojnë Kushtetutën dhe të jenë shembull i respektimit të ligjit”, deklaroi Meta.
