Qindra pista skish në Evropë qëndrojnë të braktisura, duke u bërë si “fantazma” të qendrave dimërore, për shkak të mungesës së borës vitet e fundit.
Sipas Daily Mail, vetëm në Francë 186 qendra dimërore kanë mbyllur për shkak të mungesës së borës, dhe pritet që numri të rritet, pasi shumë ski-centra të tjerë duket se po përjetojnë ditët e fundit të funksionimit të tyre.
Edhe fillimi i sezonit 2025-26 nuk bën përjashtim. Video të postuara në rrjetet sociale tregojnë sasi të ulëta bore në disa zona të Francës, Austrisë dhe Zvicrës. Në disa nga “mekkat” e sporteve dimërore të Europës, si Alpet Veriore të Francës dhe Tirolin në Austri, vërehen pjesë të pista të zhveshura nga bora, me bar, shkëmbinj dhe dhe. Skierët duhet të ngjiten në pista me lartësi më të madhe për të gjetur kushte më të mira, shpesh duke rrezikuar sigurinë e tyre.
View this post on Instagram
Ndërkohë që disa zona si Pirenejtë dhe disa qendra italiane kanë marrë borë të dendur ditët e fundit, video nga Franca dhe Austria tregojnë skierë që rrëshqasin mbi shtresa të holla të baltës të ngrirë dhe bëjnë ski mbi pista thuajse të zbrazura. Temperaturat e larta të pazakonta dhe mungesa e borës kanë prekur çdo qendër dimërore në Evropë, duke kërcënuar seriozisht ekzistencën e tyre.
Urs Lehmann, CEO i Federatës Ndërkombëtare të Ski dhe Snowboard, paralajmëroi muajin e kaluar se shkrirja e akullnajave dhe zvogëlimi i borës mund të kenë pasoja katastrofike për sportet dimërore. “Ndikimi i ndryshimeve klimatike është i frikshëm në çdo aspekt të shoqërisë. Sportet dimërore jo vetëm në nivel konkurrues, por edhe për komunitetet që mbështeten tek qendrat dimërore janë ndër të parat që përjetojnë këto pasojat shkatërruese,” tha Lehmann.
View this post on Instagram
Një raport i vitit 2023 paralajmëroi se më shumë se gjysma e qendrave dimërore në Evropë do të përjetojnë mungesë serioze bore nëse temperaturat rriten 2°C mbi nivelin paraindustrial, dhe pothuajse të gjitha do të preken nga një rritje prej 4°C, duke vënë në provë industrinë e turizmit dhe sportet dimërore.
Edhe prodhimi i borës artificiale nuk është një zgjidhje e mjaftueshme, pasi makineritë që e krijojnë shpërndajnë më shumë gazra serrë që nxisin ngrohjen globale.
Rrezik për Olimpiadën Dimërore 2026
Problemet nuk ndalen këtu: mungesa e borës mund të ndikojë edhe në Lojërat Olimpike Dimërore Milano-Kortina 2026. Organizatorët konfirmuan së fundmi se për shkak të problemeve me furnizimin e ujit, prodhimi i borës artificiale në Livigno, ku do të zhvillohen garat e freestyle skiing dhe snowboard, ka patur vonesa dhe komplikacione teknike.
/vizionplus.tv
