Mjeku infeksionist Pëllumb Pipero shprehu shqetësimin e tij për rritjen e numrit të rasteve të reja dhe të viktimave gjatë ditëve të fundit në Shqipëri.
Në një ndërhyrje me “Skype” që bëri për edicionin e lajmeve në “Vizion Plus”, Pipero tha se në spitalin Infektiv ka shumë të shtruar dhe nga ata që janë në gjendje të rëndë.
“Virusi vijon të qarkullojë, vazhdon të prekë qytetarët. Kemi një numër të shtuar të shtruarisht në Infektiv. Pothuajse Infektivi po punon me kapacitete maksimale. Midis tyre kemi edhe të sëmurë rëndë, edhe me sëmundje kronike. Kohët e fundit ka patur edhe viktima nga rastet që janë transferuar brenda spitalit, por numri më i madh është i personave që vijnë nga komuniteti, jo nga spitalet. Vazhdon të qarkullojë, ndoshta jo me të njëjtin ritëm, por numri i personave që vijnë në kontakt është shumë i madh.”
Sipas Piperos, nëse qytetarët bëjnë kthesë që tani në zbatimin e masave mbrojtëse, situata vihet nën kontroll brenda pak ditësh.
“Numrin e rasteve të prekura nuk e quaj normal për nga sjellja e qytetarëve, për nga sjellja jonë ndaj pandemisë. Nëse do të kemi pak më shumë kujdes, distancë fizike dhe përdorimi i maskës, numri i rasteve do të ishte shumë i ulët. Edhe sot të fillojmë të mbajmë maskën dhe distancën, brenda 10 ditësh epidemia mbahet nën kontroll.”
Doktori sqaroi se skema e mjekimit të pacientëve në Shqipëri ka qenë dhe është dinamike, njësoj si në vendet e tjera të botës.
