Shqipëria dhe Mali i Zi nxisin komunikimin mes njëri-tjetrit edhe përmes një pike të re të kalimit kufitar, atë të Grabomit në Malësinë e Madhe.
Shiriti i përurimit u pre nga të tre bashkë, kryeministri Edi Rama, ai malazez, Zdravko Krivokapiç dhe zëvendëskryeministri me origjinë shqiptare i Malit të Zi, Dritan Abazoviç.
Ndërtimin e infrastrukturës që lehtëson kalimin e qytetarëve dhe mallrave mes dy vendeve, kreu i qeverisë e quajti të pamjaftueshme, për aq kohë sa ato nuk heqin barrierat burokratike. Në prani të homologut të tij malazez, që refuzoi pjesëmarrjen në takimin e radhës së “Minishengenit Rajonal” i etiketuar si “Ballkani i Hapur”, në Shkup, kreu i qeverisë, e ftoi të bëhet pjesë e tij.
EDI RAMA
KRYEMINISTER I SHQIPERISE
“Dua ta falenderoj palën malazeze për realizimin e këtij investimi sepse prej sa kohësh e kishim kryer investimin dhe tani pika doganore e dytë që na bashkon dhe nuk duhet të na ndajë. Uroj shumë që me kryeministrin Krivokapiç, Abazoviç, ne të përparojmë dhe Mali i Zit ë përfshihet në iniciativën e Ballkanit të Hapur.”
Përgjigjja e Zdravko Krivokapiç ishte e drejtpërdrejt. E ardhmja e vetme e Malit të Zi është Bashkimi Evropian.
ZDRAVKO KRIVOKAPIÇ
KRYEMINISTER I MALIT TE ZI
“Duhet të kemi besim se rruga jonë e vetme është ajo drejt Bashkimit Evropian. Kjo është edhe konfirmim i lidhjes tona, të realizimit të potencialeve të këtyre vendeve dhe vlerësimit të asaj që do të vazhdojmë investimet në këtë fushë. Mali i Zi është drejtuar dhe ka marrë rrugën e zhvillimit të mençur, të qëndrueshme dhe kjo tregon se njeri pa tjetri nuk mundemi dhe bashkë mundemi shume dhe bashkë duhet të jemi në të njëjtin drejtim.”
Edi Rama lajmëroi edhe ndërtimin e urës që lidh Velipojën me Shtojin, në funksion të turizmit mes dy vendeve.
