Edhe pse ndodhej në fazën e fundit të testimit, studimet e vaksinës kundër koronavirusit të kompanisë farmaceutike Astra Zeneka janë pezulluar përkohësisht. Vetë kompania njoftoi se ka nisur kërkimet për një sëmundje të pashpjegueshme e cila është shfaqur tek një nga vullnetaret e përfshirë në testim.
Në një deklaratë Astra Zeneka tha se “procesi standard i kontrollit, shkaktoi një pauzë të vaksinimit për të analizuar të dhënat e sigurisë”. Kompania nuk ka dhënë informacione shtesë për efektin e anësor që ka shkaktuar vaksina, pacientin, apo vendndodhjen e tij, ndërsa e cilësoi atë “një sëmundje të pashpjegueshme”.
Pezullimi i përkohshëm i kërkimeve të vaksinës është bërë edhe në SHBA dhe në vendet e tjera, ku janë kryer provat . Vetëm në Amerikë kompania njoftoi rekrutimin e 30 mijë personave, vullnetarë të cilët janë bërë pjesë e studimit masiv, ndërsa në Britaninë e Madhe janë mijëra persona. Prova janë zhvilluar edhe në Brazil dhe në disa vende në Afrikën e Jugut.
Megjithatë pezullimi i përkohshëm i studimit të vaksinës, nuk është i pazakontë, dhe kompania thotë se po shqyrton reaksionet serioze të papritura. Sipas saj, sëmundja e pashpjegueshme mund të jetë një koincidencë. AstraZeneca është një nga nëntë kompanitë që aktualisht janë në fazën e fundit të testimit të vaksinës ndaj Covid-19.
