SHBA mori vendimin një ditë më parë për të pezulluar vizat për disa kategori njerëzish për 75 vende të botës, mes tyre Shqipëria dhe Kosova.
E ftuar në “Quo Vadis” të moderatores Pranvera Borakaj në Vizion Plus, analistja Arsejda Gjyli tha se kjo është çështje ekonomike e SHBA-së dhe nuk ka lidhje me politikën e brendshme të Shqipërisë.
Sipas saj, nga ky vendim preken më shumë qytetarët shqiptarë që jetojnë në SHBA sesa shqiptarët që jetojnë në vend.
Pjesë nga biseda:
Gjyli: Është përdorur politikisht si çështje, pavarësisht se është çështje që lidhet me diplomacinë, nuk ka lidhje me politikën e brendshme të Shqipërisë. Kjo ka ndodhur për 75 shtete të tjera, në varësi të ndihmës ekonomike që marrin; janë përfshirë edhe Shqipëria edhe Kosova. Retorika e Trump ka qenë kundër politikave të emigracionit edhe në mandatin e parë. Ai e konsideron këtë si barrë të madhe ekonomike. Vizat nuk janë pezulluar për të gjitha kategoritë. Ky lloj pezullimi i vizave i prek më shumë shqiptarët që jetojnë në SHBA, sesa shqiptarët që jetojnë këtu. A do të preken edhe kategoritë që kapin vizat amerikane, apo ata që kanë aplikuar për bashkim familjar? Këtu dëmtohen më shumë familjarët atje, sesa opozita që thotë se është goditje e fortë për qeverinë, siç ishte edhe paralelizmi në rastin e Venezuelës. Në këndvështrimin tim, çështja është se çfarë mund të bëjmë ne në të mirë për qytetarët shqiptarë atje. Besoj se do të jetë e ashpër deri në momentin që do të rishikohet procedura dhe do të vendosen kritere të reja, që këto shtete që përfitojnë ndihmë sociale të kenë një lloj restriksioni në këtë qasje.
