Përroi i Vërdovës në Pogradec vijon të jetë i rrezikshëm për jetën e banorëve.
Ai përbën rrezik jo vetëm për banorët të këtij fshati por edhe të banorëve që jetojnë përgjatë tij në lagjet periferike të qytetit.
Kjo për faktin se për shkak të daljes së përroit nga shtrati përveç dëmeve të shumta material është regjistruar edhe një viktimë.
Në këto kushte disiplinimi i ujërave të këtij përroi në kohë rreshjesh, sipas kryebashkiakut Eduart Kapri mund të arrihet përmes një projekti prej 2,5 milionë euro të cilin bashkia e ka gati, por e ka të pamundur financimin me të ardhurat e veta.
Përroi i Vërdovës ka një gjatësi prej rreth 3 km.
Bashkia e Pogradecit ka kryer disa investime të vogla për pastrimin e tij dhe ndërtimin e tri pritave malore, por ato janë të pamjaftueshme.
Ndërkohë që zgjidhja përfundimtare mund të vijë vetëm nëpërmjet projektit të paraqitur nga ana e bashkisë, projekt i cili gjithnjë sipas kryebashkiakut Kapri nuk është miratuar nga qeveria shqiptare.
