Mijëra protestues në Hong Kong pushtuan sërish rrugët e vendit. Tubimi u përshkallëzua në qendër të qytetit ndërsa policia përdori gazin lotsjellës për të neutralizuar turmën e cila hodhi bombola Molotov.
E ndërsa Victoria Park ishte mbushur me tym nga gazi lotsjellës, protestuesit bënin thirrje për autonomi të plotë. Ata shkelën edhe urdhrin e qeverisë duke përdorur maska gjatë protestës.
Disa xhama të dyqaneve në shesh u thyen, ndërsa protestuesit spërkatën me bojë të kuqe muret e ndërtesave me mbishkrime për autonomi.
Bankat dhe bizneset kineze ishin në shënjestër të protestuesve, ndërkohë që autoritetet kanë nisur hetimet për kapjen e autorëve të shkatërrimit.
Pavarësisht thirrjeve për të dhënë dorëheqjen, liderja e Hong Kongut, Carrie Lam urdhëroi forcat e sigurisë të qëndrojnë në gatishmërinë maksimale.
Ajo që është vënë re gjatë protestave 4 mujore në Hong Kong është se zemërimi ndaj Pekinit është rritur. Madje demonstruesit akuzojnë qeverinë qendrore për shkelje të lirive të garantuara për Hong Kongun.
