Në përgjigje të kritikave dhe paralajmërimeve, Kompania farmaceutike Astrazeneca fajëson BE për vonesën e autorizimit i cili ka ndikuar pashmangshëm edhe procesin e prodhimit të vaksinës si dhe nënshkrimin e kontratave të furnizimit.
Shefi ekzekutiv i kompanisë anglo-suedeze, Paskal Soriot gjithashtu argumentoi se marrëveshja me Britaninë e Madhe është nënshkruar tre muaj më herët se sa me unionin.
PASCAL SORIOT
CEO I ASTRAZENECA
“Astrazeneca nuk i ka bërë padrejtësi BE-së, por objektet e prodhimit të vaksinave për të përmbushur nevojat e shteteve anëtare aktualisht janë më të ultat në rrjet. Ka shumë çështje për të cilat po punojmë për ti zgjidhur, por në thelb jemi tre muaj me vonesë. BE nuk mund të pretendojë që të ecë paralelisht me Britaninë e Madhe, pasi marrëveshja u nënshkrua më vonë.”
Ndërkohë sipas Soriot, një tjetër problematikë që ka prekur kapacitetin e prodhimit është edhe mungesa efektive e lëndës së parë.
“Problemet janë përqendruar në përgatitjen e vaksinës në dy fabrikat e përdorura për BE, në Hollandë dhe në Belgjikë. Kulturat qelizore që janë faza e parë e përgatitjes nuk patën rendimentin e pritur. Probleme të ngjashme ekzistonin edhe në fillim të prodhimit të vaksinave të destinuara për Britaninë, por kontrata me Mbretërinë e Bashkuar u nënshkrua tre muaj para marrëveshjes së vaksinës me BE. Kështu që patëm kohën e nevojshme për të rregulluar të gjitha problemet”
Shefi ekzekutiv i Astrazeneca deklaroi se kompania ka nisur punën me studiuesit ne universitetin e Oxfordit, për të zhvilluar një vaksinë në përgjigje të mutacionit nga Afrika e Jugut.
Ndërsa shefja ekzekutive e Agjencisë Europiane të barnave, Emer Kuk deklaroi se variantet e reja po shtohen prandaj kërkohet monitorim i vazhdueshëm nëse vaksinat do të jenë efektive.
EMER COOKE
SHEFE EKZEKUTIVE, AGJENCIA EUROPIANE E BARNAVE
“Kapaciteti i prodhimit mund të rritet, ne po punojmë me kompanitë për këtë dhe shpresojmë se shumë shpejt do të zgjidhet. Ndërkohë, po shohim shumë muatacione të reja të koronavirusit dhe kjo shton nevojën për të monitoruar me më shumë përpikmëri se si përgjigjen vaksinat ndaj varianteve të reja. Të dhënat aktuale sugjerojnë se janë efektive por duhet përditësim i vazhdueshëm.”
Agjencia Europiane e barnave pritet të autorizojë vaksinën e Astrazeneca-s në fund të javës. BE nënshkroi një marrëveshje në muajin gusht për 300 milion doza, me një mundësi për 100 milion shtesë. Menjëherë pas miratimit ishte parashikuar shpërndarja e 80 milion dozave në 27 vende deri në mars.
