Pas disa ditësh nën ujë, kjo e martë ka sjellë përmirësim të situatës në zonat e përmbytura. Në qarkun Lezhë, prurjet në lumin Drin, Gjadër e Mat janë pakësuar.
Po ashtu dhe niveli i ujit në hidrovore, sipas shtabit të emergjencave, ka pësuar rënie. Ndërkohë vazhdojnë të jenë nën ujë rreth 2600 hektarë tokë bujqësore, kryesisht në zonën e Torovicës e Zadrimës.
Situatë ende e vështirë paraqitet në qarkun e Shkodrës.
Ndonëse moti është përmirësuar prurjet e lumenjve vazhdojnë të jenë në kufijtë e maksimales, ndërsa ka shkuar në 1900 hektarë sipërfaqja e tokave të përmbytura. Sipas autoriteteve, rruga për në Obot vazhdon të mbetet e bllokuar për shkak të prezencës së ujit.
VOLTANA ADEMI
KRYEBASHKIAKE NE DETYRË E SHKODRËS
Nuk kemi dëmtime në banesa. Situata është e menaxhueshme, por pak më e rënduar sesa mbrëmë që do të thotë kemi shkarkesa që vijnë nga kaskada.
Ndërsa kryeministri Rama gjatë inspektimeve në Novoselë, pohoi problematikën e zonës në vite, ndërsa tha se falë investimeve të qeversië shqiptare, situata është normalizuar.
Problem mbetet dhe zona e Lurës në qarkun e Dibrës. Nga reshjet e shumta dy furgonë pasagjerësh sipas banorëve të fshatit Krej Lurë janë bllokuar për shkak të përmbytjes së rrugës.
BANOR
Kanë mbetur dy furgona nën ujë. Po të ishte pastruar gropa nuk do kishte ndodhur kjo që shihni.
Banorët thonë se janë lënë në harresë nga autoritetet pasi prej më shumë se një jave nuk kanë pasur energji elektrike.
BANOR
Kemi dhjetë ditë pa drita. Shteti na ka lënë në harresë
Ndërkohë në qarkun e Durrësit nuk raportohet për probleme, pasi uji është tërhequr.
