Përmet, “shkrihet” komisariati
Furtunë shkarkimesh në komisariatin e Përmetit. Drejtori i Përgjithshëm i Policisë së Shtetit, Haki Çako firmosi largimin dhe ndëshkimin e drejtuesve kryesore, pasi kane lejuar ndërtimin pa leje të një biznesmeni, në Grykën e Këlcyrës.
Përgjegjës kryesor u gjet shefi i komisariatit të Përmetit, Gazment Shehu, i cili u shkarkua nga detyra. Po ashtu u largua shefi i stacionit te Këlcyrës Edmond Anxhara, si dhe një specialist.
Por shërbimi i çështjeve te brendshme ka bere përgjegjës edhe dy zyrtare te larte te Drejtorisë se Policisë se Gjirokastrës: vete drejtori Lorenc Panganika dhe zëvendësdrejtori Koço Dafa kane marre paralajmërim per shkarkim.
Hetimet për këtë ngjarje nisën me 5 shtator, kur në grykën e Këlcyrës nisi puna për devijimin e një burimi natyror uji. Edhe pse në atë kohë është dërguar për kontroll grupi i postës së Policisë së Këlcyrës, ngjarja nuk është raportuar pranë strukturave përgjegjëse dhe në Prokurori.
Për këtë arsye të gjithë zyrtarët e policisë së Përmetit, janë akuzuar edhe për shpërdorim detyre.
Ministri i brendshëm Fatmir Xhafaj, përmes një letre drejtuar krerëve të Policisë së Shtetit, dënoi ashpër mosreagimin e strukturave përgjegjëse. Ai thekson se askush nuk ka imunitet për t’i shpëtuar ndëshkueshmërisë në rastin e ndërtimeve të paligjshme dhe akoma më keq, kur kryhen krime që cenojnë mjedisin, shëndetin, sigurinë apo jetën e qytetarëve.
