Situata në fshatin Hasturkas, të njësisë administrative Libofshë vijon të mbetet problematike edhe 24 orë pas daljes së lumit Seman nga shtrati, ndonëse niveli i ujit ka shënuar një rënie të lehtë.Sipas banorëve të zonës, uji është ulur rreth 20 cm, por pavarësisht kësaj, 20 banesa vazhdojnë të jenë të përmbytura, ndërsa dëmet janë të konsiderueshme edhe në stane, sipërfaqe të mëdha tokash bujqësore , kultura të mbjella, kryesisht vreshta, ullinj dhe foragjere , por edhe koshere bletësh. Përballë kësaj situate dëshpëruese banorët shprehen se qeveria duhet të dërgojë sa më parë ekipet e verifikimit, për të evidentuar dëmet e shkaktuara nga përmbytja dhe për të hapur rrugën e dëmshpërblimeve.
Nga ana tjetër, situata mbetet alarmante për shkak të çarjes së argjinaturës në disa segmente , fakt që sipas banorëve përbën një rrezik serioz, pasi parashikohen reshje të reja shiu dhe ekziston frika e një vërshimi të dytë të ujit.Banorët kërkojnë ndërhyrje urgjente nga Bordi i Kullimit, për të bllokuar çarjet dhe për të shmangur përkeqësimin e situatës.
“Kam 70 dylym tokë të mbjellë me prodhimet e sezonit. Janë të gjitha të përmbytura. Niveli i ujit ka nisur mbrëmë të bijë. Kam cuar blegtorinë që po kullot. Sepse morëm bazën ushqimore, pro u njom. Jemi në një situatë që nuk dimë çdo të bëhet. Sepse bazë ushqimore nuk gjejmë dot më në këtë periudhë. Ishalla na ndihmon shtetit. Sytë te qeveria i kemi. Unë kam 7 krerë lopë. Por s’kam bazë ushqimore. Nuk pata ngordhje. Qeveria të verë dorën në zemër, të marri masa të paktën për bazën ushqimorë të blegtorisë”, tha një banor.
Sipas të dhënave nga terreni, situata po shkon gradualisht drejt normalizimit. Banorët raportojnë se ka patur pak shpesë të ngordhura, por nuk ka pasur bagëti të mbytura, falë ndërhyrjes së forcave të ushtrisë, të cilat kanë ndihmuar në largimin e bagëtive nga stane dhe banesa të rrethuara nga uji. Disa banorë mbetën të izoluar për shkak të përmbytjes, por janë evakuuar dhe sistemuar në zona të sigurta, jashtë rrezikut nga uji.
Situata në Hasturkas mbetet nën monitorim të vazhdueshëm, ndërsa banorët presin masa konkrete dhe ndërhyrje të shpejtë për riparimin e argjinaturës dhe vlerësimin e dëmeve.
/vizionplus.tv
