Reshjet intensive te shiut qe vazhdojne prej orës 3 të mëngjesit kanë paralizuar këtë të martë qytetin e Durrësit.
Disa rrugë dhe lagje janë përmbytur, duke e bërë të vështirë lëvizjen e këmbësorëve dhe qarkullimin e automjeteve.
Në akset kryesore, rrugët janë mbuluar nga uji, ndërsa automjetet kanë hasur vështirësi në qarkullim.
Situata ka sjellë pezullimin e përkohshëm të punës në Portin e Durrësit, si dhe mbylljen e shkollave për arsye sigurie. Për shkak të përmbytjeve dhe kushteve të rrezikshme, janë mbyllur edhe aktivitetet tregtare në disa zona të qytetit.
Autoritetet u bëjnë thirrje qytetarëve të shmangin lëvizjet e panevojshme dhe të tregojnë kujdes të shtuar, ndërsa situata vijon të monitorohet nga strukturat përkatëse.
Edhe në Lezhë reshjet e dendura të shiut që kanë rënë gjatë natës kanë sjellë problematika në disa zona të qytetit. Më problematike paraqitet situata në lagjen “Besëlidhja”, si edhe në disa hyrje shkollash, ku niveli i ujit ka arritur disa centimetra, duke vështirësuar qarkullimin e këmbësorëve dhe mjeteve.
Autoritetet bëjnë me dije se kjo problematikë pritet të marrë zgjidhje përfundimtare me përmbylljen e projektit të rehabilitimit të rrjetit të ujërave të bardha dhe të zeza.
Ndërkohë edhe ne disa fshatra të Krujës ka patur përmbytje masive në tokat bujqësore.
Me dhjetra hektarë tokë bujqësore janë nën ujë, pranë mbikalimit të Patokut në autostradë. Edhe në fshatin Adriatik, disa banesa janë të rrethuara nga uji, ndërsa në fshatin Fushë Mamurras është ndërprerë mësimi.
Reshjet e pandërprera të shiut kanë shkaktuar probleme të shumta edhe në rrugët nacionale të Qarkut Dibër. Situata më problematike paraqitet në aksin nacional Burrel – Skuraj ku ka shembje masivesh shkëmbore e dherash në segmentin e Shkopetit.
Situata pritet të rëndohet në orët në vijim për shkak se reshjet e shiut vazhdojnë, teksa kanë krijuar fryerje të lumenjëve dhe përrenjve.
Në Shkodër nga ana tjetër problem janë reshjet me intensitet të dëborës. Me shqetesuese situata ka qenë në zonën e Bogë – Qafë Thore – Theth, ku është punuar për mbajtje hapur të saj, per shkak edhe te fluksit të lëvizjes.
Aktualisht është bërë i mundur qarkullimi por kërkohet përdorimi i gomave dimërore dhe zinxhirëve.
Dukagjini gjithashtu vijon prej 4 ditesh të jetë i izoluar. Këtë mëngjes ka patur nje tjeter shembje te rrugës.
