Spanja është përfshirë nga një valë protestash te dhunshme që prej të hënës, ditën kur Gjykata Speciale dënoi me mbi 100 vite burg 9 nga 13 ligjvënësit katalanas për tentativë të shkëputjes së rajonit gjysmë autonom nga Spanja.
Protestat u përshkallëzuan gjatë mbrëmjes së të mërkurës.
Qindra tubues u përplasën me policinë në qendër të Barcelonës, ndërsa u vunë zjarrin disa automjeteve duke e kthyer vendin në nje fushë-betejë.
Ata hodhën letra higjenike, gurë dhe shishe Molotov drejt policisë.
Uniformat blu kanë arrestuar 33 të rinj, ndërsa më shumë se 100 persona, mes tyre edhe 30 efektivë policie kanë marrë ndihmë mjekësore për shkak të lëndimeve.
Presidenti I Katalonjës Quim Torra dënoi protestat e dhunshme. Ai madje kërkoi amnisti për liderët katalanas të dënuar me mbi 100 vite burg në total.
QUIM TORRA
PRESIDENT I KATALONJES
“Ne gjithmonë e kemi dënuar dhunën. Ne nuk mund të lejojmë që grupet e infiltruara dhe provokuesit e dhunës të shkatërrojnë vendin. Ne nuk mund të biem në grackën e tyre. Qeveria e Katalonjës ju bën thirrje të ruani qetësinë”
Nga ana tjetër, kryeministri në Detyrë Pedro Sanchez kërkoi dënime të ashpra për organizatorët dhe protestuesit e dhunshëm.
PEDRO SANCHEZ
KRYEMINISTER I SPANJES
“Unë nuk do të lejoj më një përshkallëzim të dhunës. Z. Torra ka përgjegjësi politike dhe morale të dënojë dhunën e pajustifikuar.Përgjigja jonë do të bazohet në qëndrimin e drejtuesve Katalanas.”
Ndërkohë qeveria spanjolle ka marrë të gjitha masat duke shtuar numrin e efektivëve të policisë në rrugët e Barcelonës për të ruajtur qetësinë në Katalonjën e përfshirë nga protestat e dhunshme gjatë ditëve të fundit.
