“Përgjimet nuk zbulohen nga operatoret celularë”

Për ekspertët pajisja e mbërritur ne vendin tonë ka kapacitete të jashtëzakonshme teknologjike, ndërkohë që përgjimi është vetëm një nga elementët e saj. Për ekspertin e sigurisë kombëtare Alfred Duka kjo pajisje është e domosdoshme për parandalimin e kriminalitetit për shkak të cilësive që ofron. Duka thotë se pajisja e cila pretendohet se ka ardhur vetëm për qëllime trajnimi në vendin tonë nuk mund të jetë testuar në një ambient të stimuluar por në terren. Nga ana tjetër, ai thotë se ligji e ka të përcaktuar qartë se si rregullohet hyrja apo përdorimi i të tillë aseteve. Prokurori është autoriteti i vetëm që autorizon përgjimet të cilat mund të merren si provë në gjykatë. Pajisja përgjuese e cila ndodhet në ambientet e shërbimit informativ ka raste që intercepton të dhëna por që ato nuk shërbejnë si prova ndërkohë që shërbimi informativ i ushtrisë nuk mund të përgjojë qytetarët. IMSI CATCHER mbërriti në Shqipëri në portin e Durrësit dy muaj më parë por sipas kreut të shërbimit informativ Visho Ajazi Lika në Komisionin e Sigurisë ajo nuk ishte deklaruar në doganë dhe nëse pajisja mund të përgjojë cenon sigurinë kombëtare.