Përgjaket klubi i natës në Ohajo

Një ngjarje e rëndë ndodhi në Sinsinati të Ohajos në SHBA, ku në një klub nate si pasojë e të shtënave me armë, një person gjeti vdekjen dhe 14 të tjerë u plagosën. Policia njoftoi se disa prej të plagosurve kanë marrë plagë të rënda, por rrethanat dhe motivet e kësaj ngjarjeje janë ende të panjohura.

Qindra njerëz ndodheshin në klubin Kameo në kohën kur ndodhi ngjarja, ndërsa askush nuk është prangosur nga forcat e rendit. Policia ka marrë në pyetje dëshmitarë për të siguruar informacione, ndërsa ka dyshime se mund të ketë pasur më shumë se një agresor.

Është e paqartë si ka ndodhur sulmi, pasi klubi i natës kishte të punësuar policë për të garantuar sigurinë. Për momentin nuk ka dyshime për një sulm terrorist.