Ish-këshilltari i Sigurisë Kombëtare, Mike Flynn, është shprehur i gatshëm të dëshmojë në seancat dëgjimore mbi përfshirjen e Rusisë në zgjedhjet presidenciale amerikane, por kërkon në këmbim imunitet nga ndjekja penale.
Ai e ka shprehur ketë gadishmeri përmes avokatit te tij, Robert Kelner. “Gjenerali Flynn ka një histori për të treguar dhe dëshiron shumë ta tregojë, nëse rrethanat do t’ia lejojnë. Asnjë person i arsyeshëm, i cili ka përfitimin e këshillave të specializuara, nuk do t’i nënshtrohej marrjes në pyetje në një mjedis kaq të politizuar e të prirur për gjueti shtrigash, pa marrë më parë garanci kundër përndjekjes së padrejtë,” është shprehur ai.
Si komisionet e inteligjencës në Senat dhe Dhomën e Përfaqësuesve, ashtu edhe FBI-ja janë duke hetuar lidhjet e Flynn me Rusinë.
Takimet e tij me një të dërguar rus në kohën e fushatës i kushtuan ish-gjeneralit edhe vendin e punës. Sipas anëtarit demokrat të Komisionit të Senatit, Mark Warner, Rusia mund të ketë përdorur teknologjinë për të përhapur sa më shumë dizinformim, përfshirë këtu lajmet e rreme me të cilat ka bombarduar votuesit në shtetet kyçe si Uiskonsin, Miçigan dhe Pensilvani.
Ne lidhje me ndikimin rus ne fushate, senati do te zhvilloje seanca dëgjimore ku pritet te dëshmoje edhe dhëndri i presidentit Trump, Jared Kushner.
