Nga Pranvera Borakaj
740 mijë është numri i pensionistëve sot në Shqipëri, ose gati 10% më shumë se në vitin 2011. Kur flasim për moshën e tretë, ne fokusohemi vetëm te vlera monetare që ata përfitojnë çdo muaj, sepse vetëm ajo mjafton për të treguar krizën e kësaj kategorie dhe mungesën e dinjitetit që ne si shtet kemi për të shpërblyer vitet e punës së tyre.
Por harrojmë që kjo shtresë shoqërore, e cila rritet çdo ditë e më shumë, ndërkohë që numri i lindjeve vetëm pakësohet, ka nevoja shumë më të mëdha se thjesht të ushqehet.
17 mijë lekë të reja është pensioni mesatar sot në Shqipëri, ndërkohë që sipas një llogaritje të thjeshtë, vetëm për ushqim nuk mjafton një vlerë e tillë dhe sikur mos të paguaj asnjë lekë për drita, ujë, ngrohje, ilaçe, detergjent, internet etj.
Sot një i moshuar me pension mesatar në Shqipëri, merr sa 5 % e pagesë së një deputeti. Një deputeti që i vetmi kriter që duhet të plotësojë është mos të jetë daltonik dhe të dalloj ngjyrën e kartonit që e urdhëron parti të çojë në ndonjë dalje të rrallë televizive të mbaj mend përmendësh vjershën e propagandës.
Pensionisti , mund të ketë punuar edhe 40 vite mësues, mjek, inxhinier, arkitekt, mund të ketë punuar edhe një jetë në tokë, mes diellit dhe shirave në dimër, mund të jetë rropatur edhe në emigracion e para se t’i shkojë të marrë atë shpërblimin e viteve të punës, të cilat mund të jenë edhe më të ulta se vlera që merr një deputet për telefonin në muaj, në shumicën e rasteve duhet të kalojë në dyert e gjykatave, se me mish-mashin e institucioneve tona në këto 30 vjet, ku ca janë djegur e ca janë vjedhur.
Nuk është çudi aspak që mos të plotësoj as dokumentacionin tamam. Po çfarë i ofron Shqipëria një të moshuar? Diell, ajër, dhe rrugë për të ecur.
Nëse s’do kishim këtë kulturë dhe lidhje të fortë familjare, ku prindërit strapacohen për fëmijët e këta të fundit kontribuojnë për të zbutur dramën e vetmisë dhe krizës financiare të prindërve në pension, ne sot do i kishim pensionistët të derdhur në rrugë për të protestuar.
Sepse ata me gojën plot janë shtresë që i duhen më shumë partive për të ardhur në pushtet dhe kategoria që vitet e fundit të jetës i kalojnë duke marr një lëmosh nga shteti se shpërblim vështirë ta quash.”
/Vizionplus.tv/
