Kandidati për deputet i PS në Korçë, Niko Peleshi ftoi të rinjtë të votojnë për Partinë Socialiste më 25 prill.
Gjatë një takimi elektoral me ta, Peleshi renditi punë që sipas tij, janë bërë nga mazhoranca.
Ai premtoi se tani është radha për të hapur inovacionin.
“Katër vjeçari i ardhshëm është një segment në rrugëtim tonë. Një rrugëtim në ngjitje jo një rrugëtim horizontal. E në këtë segment ne do të bëjmë bashkë rrugën më të bukur sepse është rruga e mundësive të të rinjve. Sot nuk jemi në Korçën e 2007-ës. Sot nuk flasim për kanalizime, për gropa në bulevard, për mungesën e një qendre sportive, apo të një teatri, të një muzeu apo të një pazari, të një qendre historike. Sot i kemi të gjitha ato, por sot na mungojnë disa gjëra të tjera. Na mungojnë mundësitë për t’u punësuar në profesione për të cilat jemi shkolluar apo jemi trajnuar. Në bazë të një projekti të Korçës ne lindëm një sektor të ri, sektorin e turizmit. Gjithçka bëhet me funksion ekonominë, në funksion të saj. Do të ecim së bashku duke hapur fronte të reja. Siç hapëm turizmin. do të hapim inovacionin. Inovacioni është një mundësi pafund, sepse është një treg që nuk ka konkurencë. Jemi rrethuar nga modele të ndryshme në shoqëri. Disa janë të drejta, disa janë të shtrembra. Ftesa ime për ju sot është, kthejini kurrizin modeleve të vjetra, kthejini kurrizin rrugës së shkurtër. Oferta ime është që të bëhemi bashkë, të votojmë Partinë Socialiste në 25 prill.”
