Në seancën për Shqipërinë në Komisionin e Jashtëm të Parlamentit Evropian u prezantua draft-raporti për progresin e vendit në procesin e integrimit.
Kryetari i Komisioni i Jashtëm i Parlamentit Evropian, David McAllister u ndal te zhvillimet në Shqipëri, ecuria e reformave, integrimi europian si edhe opozita shqiptare.
“Shqipëria i ka hapur të gjitha kapituj dhe është në pritje të raportit. Shqipëria duhet të vazhdojë edhe më tej të punojë për të shkuar më tej drejt procesit të anvancimit. Çdo vend ecën në mënyrë individuale në këtë proces. Duhet parë ndryshimi i madh për qytetarët, vlerësojmë se të gjitha forcat politike kanë pasur interes drejt procesit të integrimit. Inkurajojmë dialog politik, është me rëndësi që edhe mazhoranca të krijojë hapësira për opozitën dhe opozita të bëhet më bashkëpunuese në interes të popullit dhe të demokracisë. Protestat e dhunshme nuk janë të pranueshme në një shoqëri demokratike”, tha McAllister.
Raportuesi i PE për Shqipërinë ka shprehur shqetësime të forta lidhur me situatën politike dhe të drejtat demokratike si dhe korrupsionin.
“Zgjedhjet dhe klima politike nuk janë më të mirat. Ekziston një kuadër zgjedhor konkurrues. Ka shqetësime të vazhdueshme për keqpërdorimin e burimeve administrative, pretendime për blerje votash, presion ndaj votuesve, por edhe për këtë polarizim të vazhdueshëm politik, i cili po minon besimin tek institucionet dhe mbikëqyrjen parlamentare. Veçanërisht në javët dhe muajt e fundit, situata është radikalizuar sërish, duke u përpjekur të bëhet politikë në rrugë dhe jo në sallat e Parlamentit. Sa i përket sundimit të ligjit dhe korrupsionit, ne do të mirëprisnim që reforma në drejtësi dhe procesi i vettingut të vazhdojnë të ecin përpara; Shqipëria është vendi që ka ndërmarrë hapat më të thellë në këtë drejtim, por mbeten shqetësime për efikasitetin dhe procedurat e gjata. Korrupsioni mbetet një nga problemet më të mëdha në vend; kërkohet një bilanc më i fortë hetimesh dhe dënimesh në nivele të larta”, tha Andreas Schieder.
Eurodeputeti Andrey Kovatchev u ndal edhe te çështja ndaj zëvëndëskryeminstres Belinda Balluku.
“Hetimet, përfshirë ato që përfshijnë zyrtarë të lartë si Zëvendëskryeministri, duhet të ecin përpara pa asnjë ndërhyrje. Sundimi i ligjit nuk mund të jetë selektiv. Prandaj, kërkesa për heqjen e imunitetit parlamentar pa vonesë është përgjegjësi e Parlamentit. Jam i shqetësuar për ndryshimet e propozuara në procedurën penale për të mbrojtur ministrat dhe zyrtarët e lartë nga pezullimi ndërkohë që janë nën hetim penal. Legjislacioni duhet të jetë në përputhje me standardet ndërkombëtare demokratike”, tha Kovatchev.
Por Eurodeputeti Thomas Waitz tha se pavarësia e gjyqësorit në Shqipëri është një aspekt ku janë parë rezultate konkrete.
“Fakti që SPAK-u, si njësia kundër korrupsionit, është në gjendje të arrestojë një politikan të nivelit të lartë, ish-përfaqësues të lartë, tregon se ka hapësirë veprimi. Ky është një sinjal shumë i mirë në praktikë, përtej legjislacionit.Dhe pikërisht, është e vërtetë ajo që thanë edhe folësit e tjerë: ligji duhet të zbatohet njësoj për çdo qytetar”, tha Waitz.
Raporti i Komisionit Evropian thekson se për Shqipërinë sfidat kryesore mbeten implementimi i reformave ligjore, lufta kundër korrupsionit dhe përmirësimi i klimës politike.
