Hiqini Rusisë dhe Bjellorusisë të drejtat e hyrjes në të dhënat e Interpolit dhe më pas pezullojini ato krejtësisht nga Interpoli, thuhet në kërkesen që përmban raporti i miratuar me 607 vota pro, 13 kundër dhe 11 abstenime nga Parlamenti Evropian në lidhje me marrëveshjen e re të bashkëpunimit ndërmjet BE-së dhe Organizatës Ndërkombëtare të Policisë.
Në tekst, eurodeputetët theksojnë se pushtimi rus i Ukrainës është një kërcënim i drejtpërdrejtë për bashkëpunimin ndërkombëtar në çështjet e zbatimit të ligjit dhe qasja e vazhdueshme e Rusisë në të dhënat e Interpolit po rrezikon bashkëpunimin e BE-së me Organizatën.
Sipas raportit, marrëveshja duhet të garantojë gjithashtu akses në bazat e të dhënave të Interpolit nga agjencitë BE-ja përkatëse: Europol (Agjencia e BE-së për Bashkëpunim në Zbatimin e Ligjit), Eppo (Zyra e Prokurorit Publik Evropian), Eurojust (Agjencia e BE-së për Bashkëpunim në Drejtësinë Penale) dhe Frontex (Agjencia Evropiane e Kufirit dhe Rojës Bregdetare).
Si pjesë e marrëveshjes, eurodeputetët kërkojnë garanci për respektimin e rregullave evropiane për mbrojtjen e të dhënave dhe garancinë që të dhënat personale nuk mund të përdoren në lidhje me dënimet me vdekje ose trajtimin çnjerëzor.
