Për të dytën ditë radhazi, deputetë të Partisë Demokratike të Kosovës kanë bllokuar hyrjen e Qeverisë në Prishtinë. Por në qendër të aksionit të tyre nuk është vetëm protesta politike. Kërkesa e PDK-së është konkrete: caktimi i menjëhershëm i një date për vazhdimin e seancës konstituive dhe konstituimin e Kuvendit të Kosovës.
PDK-ja akuzon udhëheqjen e vendit se po zvarrit procesin dhe se nuk po lejon që institucionet e reja të nisin punën. Një ditë më parë, partia ka kërkuar zyrtarisht që seanca konstituive të vazhdonte më 14 gusht, duke argumentuar se procesi duhet të vijojë pavarësisht mosmarrëveshjeve për postin e presidentit.
Ndërkohë një ditë me parë Kryetari i LDK-së, Lumir Abdixhiku njoftoi tërheqjen e partisë nga çdo kërkesë për poste. LDK-ja nuk kërkon më as kryetarin e Kuvendit, as ministri dhe as postin e presidentit, duke ia lënë përgjegjësinë për formimin e institucioneve Lëvizjes Vetëvendosje.
Abdixhiku ka deklaruar se LDK-ja do të qëndrojë në opozitë, por njëkohësisht është e gatshme të kontribuojë për zgjedhjen e një presidenti konsensual, jopartiak dhe një figure që, sipas tij, mbron Republikën dhe kushtetutshmërinë.
Kështu, ndërsa PDK-ja rrit presionin për të rikthyer procesin parlamentar dhe kërkon një datë konkrete për konstituimin e Kuvendit. LDK-ja ka zgjedhur të heqë dorë nga çdo përfitim institucional, duke i hapur rrugë një zgjidhjeje.
Por, për momentin, ngërçi mbetet. Kuvendi ende nuk po arrin të nisë normalisht punën, ndërsa partitë politike vazhdojnë përplasjen për mënyrën se si duhet të zhbllokohen institucionet e Kosovës.
