Partia Demokratike i kërkoi Prokurorisë verifikimin e figurës së një tjetër kryebashkiaku të PS.
Bëhet fjalë për Mark Babanin, drejtues të Bashkisë së Vaut të Dejës, pasi sipas sëlisë blu, ai dyshohet se ka fshehur ndalime, denime dhe dëbime nga Italia dhe Maqedonia e Veriut.
Sekretari i Përgjithshëm i PD, Gazment Bardhi i vuri në dispozicion prokurorisë të gjithë informacionin që disponon Partia Demokratike për kryebashkiakun e tretë të Edi Ramës, që sipas tij, rezulton me të kaluar kriminale.
“Ai dyshohet se ka qenë i arrestuar/ndaluar në Itali gjatë periudhës 1994 -1999 dhe, më pas, ndaj tij është marrë masa e dënimit dhe dëbimit nga autoritetet përgjegjëse italiane. Nga ana tjetër, të dhëna të bëra publike më parë tregojnë se ai ka qenë i arrestuar/ndaluar dhe më pas dënuar edhe në Republikën e Maqedonisë së Veriut gjatë periudhës 2002-2003.”- thuhet në shkresën e Partisë Demokratike.
Selia blu pretendon se Mark Babani ka gënjyer në formularin e dekriminalizmit, raporton Vizion Plus.
“Në Formularin e Vetëdeklarimit shtetasi Mark Babani ka deklaruar se ka jetuar për 5 vite në Itali. Nga verifikimi i të dhënave të sistemit TIMS rezulton se shtetasi Mark Babani nga periudha 1994 – 2005 nuk ka udhëtuar në asnjë rast të vetëm në drejtim të Italisë me identitetin e tij real, çka përbën një indicie për saktësinë e të dhënave të bëra publike më parë.”
Partia Demokratike vë në dijeni Prokurorinë se Mark Babani ka përdorur në të kaluarën 3 identitete të tjera që nuk i ka deklaruar në formular.
“Në Formularin e Vetëdeklarimit shtetasi Mark Babani ka deklaruar se ka mbajur identitetin e ndryshuar Mark Ndoc Babaj, i datëlindjes 24.12.1966. Ekzistojnë dyshime të arsyeshme sipas indicieve të bëra publike më parë, se ky shtetas, gjithashtu në mënyrë ilegale ka mbajtur edhe disa identitete të tjera, të padeklaruara në Formularin e Dekriminalizimit, si më poshtë:
- Mark Ndoc Babani, i datëlindjes 24.12.1965
- Marq Saimir Babaj, i datëlindjes 11.06.1967
- Ylli Saimir Babaj, i datëlindjes 02.11.1968”-
Partia Demokratike thotë se pret një verifikim dhe reagim të shpejtë nga Prokuroria edhe për këtë rast, sikurse ka kërkuar edhe për Valdrin Pjetrin dhe Agim Kajmakun.
