Nesër në orën 13:00 Partia Demokratike mbledh Kryesinë për të vendosur datën e fillimit të protestave kundër qeverisë Rama.
Kryetari i PD Sali Berisha gjatë takimit me demokratët në Elbasan deklaroi se pas vendimit të Gjykatës Kushtetuese për kthimin në detyrë të Belinda Ballukut, opozita do të nisë protestat para kryeministrisë.
“Diktoi çdo gjë sot, Rama diktoi Gjykatën dhe hoqi masën e pezullimit. Ne do ngrihemi dhe nuk do ndalemi deri në largimin e tij. Ata që janë gati, me ata do ngrihemi. 3000 shqiptarë janë gati që nesër. Do shtohemi. Nuk rrihet më”, tha Berisha.
Berisha deklaroi se opozita do të protestojë edhe për zgjedhje të lira e të ndershme.
“Ne nuk e lëmë rehat Edi Ramën, është në gjak me ne për votën e lirë. O të votojmë të lirë, o do shuhemi. Nuk do rrimë ne në funksion të një farse, jo ne nuk shuhemi”, tha Berisha.
Berisha u kërkoi ndjesë anëtareve për mbështetjen me firma të Endri Shabanit, duke sqaruar se firmat u tërhoq.
“Gabim ishte ajo me firmat e Endri Shabanit, avokatit të Edi Ramës, dhe unë ju kërkoj ndjesë. U dhanë ato firma në periudhën kur pati mbështetje ndaj kandidatit tonë të Tiranës dhe ato firma u tërhoqën menjëherë, secili nga deputetët i hoqi ato firma menjëherë”, tha kreu i PD.
Nga ana tjeter Berisha premtoi se PD do të ndryshojë e do të hapet ndaj të rinjve./vizionplus.tv
