Partia Demokratike dhe aleatët e saj kanë prezantuar këtë të enjte platformën se cilat do të jenë detyrat e qeverisë tranzitore.
Sipas platformës, qeveria tranzitore do të ketë 10 detyra kryesore ku mes të cilave ajo e godtijes së strukturave politike në përfshirjen e shit-blerjes së votës; pajisjen e shtetasve me letërnjoftime; shkëputjen e qeverisë nga krimi apo dhe monitorimit ndaj presionit që ushtrohet ndaj administratës publike.
Por krahas detyrave, kreu demokrat Lulzim Basha u ndal edhe tek profili që do ketë qeveria tranzitore.
Në ndryshim nga ajo e vitit 2017, Basha tha se këtë herë nuk do të ketë një kabinbet të përbërë nga ministra të PS e PD por do të jenë personalitete jashtë politikës.
“Më lejoni të jem i qartë se çfarë nuk do të jetë, koalicion i madh mes opozitës dhe PS, do të jetë një qeveri provizore tranzitore me personalitete jashtë konfliktit të interesit që kërkon vullnet dhe mbështetje politike. Detyrat duhet të shkojnë përtej kësaj, ne sot jemi për detyrat në raport me procesin zgjedhor të lirë. Është e vërtetë, disa nga këto cështje janë të mbartura, ajo që bën diferencën është sa ka ndikuar problemi në rezultatin zgjedhor”, tha Basha.
Kreu demokrat tha gjithashtu në fjalën e mbajtur para aleatëve se nuk do të ketë zgjedhje pa pjesëmarrjen e opozitës.
Qeveria tranzitore, sipas Bashës, do të qëndrojë në detyrë për një periudhë 4 deri në 6 muaj.
Detyrat e qeverisë tranzitore:
- Goditje me tolerancë zero e strukturave politike dhe kriminale të përfshira në shitblerjen e votës, intimidimin e votuesve dhe manipulimin e zgjedhjeve.
- Ndalim i presionit qeveritar mbi drejtësinë për t’i hapur rrugë hetimit të bashkëpunimit mes krimit të organizuar dhe pushtetarëve për manipulimin e zgjedhjeve.
- Monitorim i rreptë dhe goditje me tolerancë zero ndaj presionit mbi administratën publike dhe zgjedhësit.
- Ndalim i prokurimeve, tenderave, koncesioneve\PPP-ve, licensave, favoreve dhe abuzimeve të tjera me burimet shtetërore.
- Kontroll dhe marrje masash për emërimet dhe shkarkimet e paligjshme nga administrata publike dhe kompanitë shtetërore, si dhe për ndryshimet e paligjshme në listat e ndihmës ekonomike, personave me aftësi të kufizuar etj.
- Pajisje e shtetasve me letërnjoftime, skema lehtësuese dhe hetim penal i fallsifikimeve të letërnjoftimeve.
- Regjistrim i adresave të të gjithë shtetasve dhe hartim me integritet i listave të zgjedhësve.
- Hetim dhe ndëshkim me tolerancë zero i votimit fiktiv të emigrantëve.
- Shkëputje e lidhjes së policisë me krimin, goditje e policëve të inkriminuar, angazhim i policisë kundër krimit zgjedhor dhe garantim i sigurisë në zgjedhje.
- Raportim me transparencë i veprimtarisë ligjzbatuese dhe akses i besueshëm për opozitën.
