Partia Demokratike kërkon të thërrasë në Komisionin Hetimor për inceneratorët, figurat kryesore të qeverisë, duke nisur nga kryeministri Rama, tek numri dy i qeverisë, Arben Ahmetaj.
Kryetarja e Komisionit, Jorida Tabaku deklaroi se duhet të dëshmojnë gjithashtu, kryebashkiaku i Tiranës, Erion Veliaj së bashku me krerët e Bashkisë së Elbasanit e Fierit, ish-ministrat Lefter Koka e Damian Gjiknuri, si dhe Klodian Zoto e Mirel Mërtiri.
Komisioni Hetimor do të funksionojë deri në janar dhe do të ketë në fokus kontrollin e ligjshmërisë së veprimeve të organeve publike në procedurat për ndërtimin dhe administrimin e impianteve të trajtimit të mbetjeve urbane.
Tre inceneratoret në Tirane, Elbasan e Fier kanë qenë në qendër të aksionit të opozitës, e cila ka depozituar edhe padi në SPAK për këto kontrata.
