Këshilli i Mandateve dhe Rregullores është përfshirë nga debate mbi gjendjen e krimit në vend. I mbledhur për të diskutuar mbi Kodin e Etikës, të propozuar nga socialisti Taulant Balla, opozita foli për lidhje të politikanëve me botën e krimit. Fakt të cilin e pohoi pas mbledhjes demokrati Eduard Halimi.
“Deputetët të cilët kanë lidhje me krimin, lidhje familjare me krimin, lidhje shoqërore me krimin, janë financuar nga paratë e errëta të krimit të organizuar duhet të largohen dhe të lënë mandatin. Deputetë që kanë përfituar fonde publike, koncesione drejtpërdrejt, personalisht, apo nëpërmjet fëmijëve të tyre, duhet të lënë mandatin dhe të largohen.”
Duke sqaruar vendimet e Këshillit të Rregullores, socialistja Vasilika Hysi, tha se ligjvënësit demokratë nuk pranuan miratimin e Kodit të Etikës, me pretendimin se duhet rishikuar.
Në mbledhjen e Këshillit u vendos të ngrihet një grup pune prej tre deputetësh, nga PS, PD dhe LSI, të cilët do të përgatisin amendamente mbi draftin e propozuar.
