Partia Demokratike dëgjoi nga afër shqetësimin e banorëve të Durrësit, të cilët pretendojnë se nuk po gjejnë zgjidhje për banesat e shkatërruara nga tërmeti.
Kreu i degës së PD në Durrës, Ferdinand Xhaferraj takoi një qytetare, Vera Përgega, e cila shprehet se as kryetarja e bashkisë nuk i jep dot zgjidhje.
Ajo thotë se ka marrë një shumë parash, por janë të pamjfatueshme për rindërtimin e shtëpisë së rrënuar.
“Mua më doli DS3 shtëpia. DS3 i thonë 5 milionë. I mora ato 5 milionë, mu dukën vonë me u marrë se jam në hall. Hyjmë, filluam riparimet, bëmë gropën këtu, duke riparuar instalimet, hatri i zotit ra soleta. Deshi Zoti, faleminderit Zoti shpëtuan robt pa vdekur. Ika te policia, thanë kështu puna. Thanë ne s’kemi punë me këtë punë. Nuk është për ne kjo punë. I them operativit të zonës, thotë shko te kryetarja e Komunës. Ika te kryetarja e Komunës, nuk kam çfarë të bëj thotë. Mos më hajde fare, unë nuk kam çfarë të bëj. I kanë marrë lekët ata që nuk kanë fare problem në botë. Shumë mirë ore që i kanë marrë po të paktën të më japing mua lekun tim. Çfarë mund të bëj unë më 5 milionë lekë? Unë kam nevojë për shtëpi. Ata kanë thënë është për shembje, kjo shtëpi nuk bëhet. Tani hajde ta bëjnë me 5 milionë. S’kam lënë derë pa shkuar e pa u ankuar, për të kërkuar të drejtën time, e drejta që më takon.”
Duke ju referuar këtij rasti, PD thotë se banorët e Durrësit janë në hall, edhe pse kanë kaluar 9 muaj nga tërmeti.
“Në Durrës, pallatet dhe shtëpitë e shkatërruara nga tërmeti qëndrojnë ende si gërmadha.Edhe pse kanë kaluar 9 muaj nga 26 nëntorit i vitit të kaluar, banorët janë pa zgjidhje.”
