Kreu I Bindjes Demokratike, Astrit Patozi ka bërë një koment në lidhje me krizën politike që ka përfshirë vendin tonë.
Në një postim në “Facebook”, Patozi duke iu drejtuar të gjithëve, shprehet se kriza nuk është fundi I botës ndërsa nuk nguron që ta cilësojë vendimin e Metës për anulimin e zgjedhjeve si papërgjegjshmëri.
Sipas Patozit, shkaktari kryesor I krizës është presidenti Meta si dhe mazhoranca që e ka zgjedhur President.
Duke u rikthyer edhe njëherë në vitin 2017, kohë kur Meta u emërua si President, Patozi thotë se zgjedhja e tij ishte një internim nga politika.
“Për ata, që sot po çuditen shumë me përshkallëzimin e pashembullt të konfliktit të Presidentit të Republikës me shumicën qeverisëse, në pozitat e popullit të lënduar nga papërgjegjësia e kreut të shtetit. Apo dhe për të tjerë që kanë ndërruar pozicionin, koalicionin apo qoftë edhe vetëm interesin, për shkak të hallit të ri, në krahasim me atë të dy vjetëve të shkuara. Natyrisht, edhe për ata, që janë gati ta pranojnë si Mesian e tyre, të njëjtin person, të cilin para pak kohësh e konsideronin si shefin e një organizate të rrezikshme kriminale. Nuk keni pse çirrni faqet dhe mos bëni sikur po përjetoni fundin e botës, se ai nuk ka mbërritur ende dhe nuk ka për të ardhur ndonjëherë në Shqipëri. Thjesht për t’ju freskuar kujtesën, po ju ftoj që të lexoni diçka të shkurtër, që kam shkruar më 29 prill 2017, me rastin e zgjedhjes së Presidentit të Republikës, Ilir Metaj. Konsiderojeni këtë si një ndihmesë modeste për të shpjeguar krizën dhe për të njohur më mirë shkaktarët.”
