Pastruesja Rozeta Dobi dhe djali i saj Havier Dobi u lanë në burg nga Gjykata e Tiranës.
Në kafazin e sigurisë ata u shfaqën të heshtur ndërsa 49-vjeçarja ishte e përlotur. Pasi dëgjoi qëndrimet e palëve, trupi gjykues e konsideroi të ligjshëm arrestimin e tyre dhe vendosi masën e sigurisë “arrest me burg” .
Nënë e bir akuzohen për vjedhjen e afro 700 mijë euro në disa banesa në kryeqytet.
Vjedhjet u zbuluan pas denoncimit të bërë nga Alda Klosi, pronarja e një banese në rrugën e Kosovarëve të cilës i kishin marrë rreth 120 mijë euro. Për të cilën prokuroria nisi gjithashtu hetimet nëse i ka paratë të deklaruara apo jo.
Pastruesja Rozeta Dobi dhe djali i saj u identifikuan pasi ranë në sy për shkak të jetës dhe postimeve luksoze që i biri bënte në rrjetet sociale.
Në total policia ka sekuestruar më shumë se gjysmë milionë euro dhe 3 makina të shtrenjta. Vjedhja dyshohet se u realizua më 15 dhjetor të vitit të kaluar. Por ka dyshime se Rozeta dhe Havier Dobi mund të jenë të përfshirë edhe në vjedhje të tjera.
Alda Klosi, në shtëpinë e të cilës u morën paratë, është ish-shefja e kabinetit të ish-zëvendës kryeministrit Arben Ahmetaj.
