Ministria e Arsimit ka mbyllur shkollën e financuar nga Irani “Saadi”. Vendimin MAS e ka marrë në datën 17 janar dhe u mbyll vetëm disa ditë pasi u dëbuan nga vendi dy diplomatët iranianë.
Ministria ka kërkuar nga shkolla që të kthejë shifrat e dhëna nga nxënësit dhe të mbulojë shpenzimet për transferimin e nxënësve.
“MAS detyron institucionin: Të kthejë pagesat e kryera nga nxënësit për pjesën e papërfunduar të shkollit dhe çdo detyrim tjetër të papërmbushur që mund të ketë ndaj tyre. Të pajisë çdo nxënës me dokumentacionin e nevojshëm shkollorë që do të shërbejë për transferimin e tij në një institucion tjetër të arsimit parauniversitar. Të mbulojë të gjithë shpenzimet për kryerjen e procedurave për transferimin e nxënësve në zbatim të këtij urdhri. Të dorëzojë në zyrën vendore të arsimit parauniversitar Tiranë të gjithë dokumentacionin lidhur me veprimtarinë e kryer.”
Pas vrasjes së gjeneralit iranian, Qasem Soleimani, Shqipëria vendosi të shpallë “non grata” dy diplomatët Mohammad Ali Arz Peinmanemati dhe Seyed Ahmad Hosseini Alsat.
Ata përdornin statusin e tyre si punonjës të ambasadës së Iranit në Tiranë për të ushtruar veprimtari të jashtëligjshme. Ky ishte rasti i dytë i dëbimit nga Shqipëria i të dërguarve të Teheranit.
Në fund të vitit 2018 autoritetet shqiptare shpallën non grata ambasadorin e Iranit dhe një punonjës tjetër të ambasadës me arsyetimin se me veprimtarinë e tyre përbën rrezik për sigurinë e Shqipërisë.
