Testi i madh europian i Mark Zuckerberg duket se ka dështuar. Deputetë të Parlamentit Evropian u shprehën të zhgënjyer për dëgjesën me shefin e Facebook duke e akuzuar se  u mjaftua me mini-deklarata të përgjithshme dhe për shumë pyetje nuk dha përgjigje. Shefi i Grupit Parlamentar të Liberalëve, Verhofstadt paralajmëroi se themeluesi i facebook, mund të hyjë në histori si ai, që ka krijuar një monstër digjitale, që i shkatërron demokracitë tona.

 

Zuckerberg u mor në pyetje të martën nga udhëheqësit politikë dhe ligjvënësit në Parlamentin Europian në Bruksel për rreth 80 minuta, ai kërkoi ndjesë për gabimet e kompanisë por shmangu pyetjet duke premtuar se përgjigjet do të merren me shkrim në ditët e ardhshme. Rrjedha e aktivitetit parashikonte që në fillim të bëheshin të gjitha pyetjet dhe pastaj ato të merrnin një përgjigje në grup. Parlamentarët e kritikuan edhe për zgjedhjen e këtij formati i cili e lejoi t’u bënte bisht pyetjeve.

 

Eurodeputetët e vendosën përpara përgjegjësisë sa i takon lajmeve të rreme, përmbajtjeve ekstremiste, censurën dhe garantimin e sigurisë së të dhënave, por Zuckeberg ruajti të njëjtën linjë që përdori kur dëshmoi para Kongresit amerikan muajin e kaluar. “Gjatë viteve të fundit nuk kemi bërë mjaftueshëm për të mos lejuar që mjetet të cilat i kemi ndërtuar vetë, të përdoren edhe për të shkaktuar dëme. Me vjen keq per ketë”, tha ai.

 

Takimi erdhi dy muaj pasi u shfaqën lajmet se Cambridge Analytica, një firmë e të dhënave e lidhur me fushatën e Presidentit Donald Trump, kishte akses në informacionet e mbi 87 milionë përdoruesve të Facebook pa dijeninë e tyre. Sipas Komisionit Evropian, rreth 2.7 milion prej tyre ishin europianë.

Leave a Reply

Your email address will not be published. Required fields are marked *