Ditën e sotme vendi ynë do të ndikohet nga kushte atmosferike të paqëndrueshme. Sipas parashikimit, moti do të karakterizohet nga vranësira mesatare deri të dendura në të gjithë territorin.
Shërbimi Meteorologjik Ushtarak bën me dije se reshje shiu të herëpashershme me intensitet të ulët deri mesatar do të përfshijnë pjesën më të madhe të vendit deri në orët e mesditës. Herë pas here, në zonat e qendrës dhe jugut, reshjet do të shfaqen në formën e shtrëngatave afatshkurtra. Pas mesditës, reshjet e shiut do të vijojnë me intensitet të ulët kryesisht në qendër dhe jug, deri në orët e pasdites.
Në zonën e Alpeve parashikohen reshje dëbore me intensitet mesatar deri të lartë, shoqëruar herë pas here me stuhi bore. Në verilindje dhe lindje, në lartësitë mbi 100 metra, si dhe në juglindje mbi 300–400 metra, priten reshje dëbore me intensitet të ulët deri mesatar. Në pjesën tjetër të territorit, mbi 400–500 metra mbi nivelin e detit, reshjet do të jenë kryesisht në formën e dëborës me intensitet të ulët. Pas orëve të pasdites, reshjet e shiut dhe dëborës do të ndërpriten në pjesën më të madhe të vendit.
Era do të fryjë nga drejtimi juglindje–jugperëndim me shpejtësi mesatare rreth 9 m/s, ndërsa përgjatë vijës bregdetare dhe në zonat luginore ajo do të arrijë deri në 18 m/s. Valëzimi në det parashikohet të jetë i forcës 3–4 ballë.
Temperaturat do të shënojnë rënie të ndjeshme, duke zbritur deri në -4°C në Bajram Curr dhe rreth -3°C në Kukës dhe Peshkopi.
/vizionplus.tv
