Këtë krishtlindje para dhe tetraplegjikët e qytetit të Elbasanit e patën të pamundur ta festonin pasi ndodhen në grevë urie.
Të ngujuar prej tre ditësh ata thonë se nuk kanë marrë asnjë reagim nga autoritetet përgjegjëse për problemet e tyre. Personat me aftësi të kufizuara theksojnë se nuk do ta ndalin protestën deri sa ta marrin të plotë paketën e ndihmës.
“Ne kërkojmë të drejtën tonë. Ne duam ça i takon paketës. Ne e dimë sa vuajmë me këta fëmijë që kemi. I bëjmë thirrje qeverisë të kthejë kokën nga ne. Deri tani asnjë reagim fare. Siç i kemi hyrë kësaj pune nuk do t’i ndahemi.”
Për shkak të gjendjes së rënduar shëndetësore dy prej grevistëve dolën nga greva dhe u zëvendësuan me tre të tjerë.
Para dhe tetraplegjikët kërkojnë shfuqizimin e një vendimi të qeverisë që i detyron të shkojnë vazhdimisht për kontroll pranë Kempit Epror, pavarësisht se kanë statusin e invalidit të përhershëm.
Po ashtu ky vendim u kushtëzon edhe ndihmën e paketës higjieno-sanitare.
Vendimi është në kuadër të një projekti pilot që po zhvillohet vetëm në qarkun e Elbasanit.
