Ministri i Brendshëm, Taulant Balla ka falenderuar strukturat e Policisë së Vlorës, pas kapjes së automjetit në të cilin ndodheshin dy mina me telekomandë që dyshohet se do të përdoreshin në ngjarje kriminale.
Balla ka vlerësuar uniformat blu, ndërsa vë në dukje punën e tyre gjatë 72 orëve të fundit.
“Falenderoj nga zemra forcat e Policisë së Shtetit, Drejtorinë Vendore të Policisë Vlore dhe njësinë e saj operacionale, të cilat në bashkëpunim të ngushtë me Prokurorinë, kanë realizuar brenda 72 orëve të fundit dy operacione të rëndësishme për parandalimin e ngjarjeve kriminale”, shprehet ai.
Në të njëjtën kohë, ministri i Brendshëm shprehet se do të punojë për të shpërblyer punën e uniformave blu dhe për të trajtuar ato me dinjitetin që meritojnë.
“Dua t’iu siguroj se do të bëj gjithcka që ju të ndjeheni gjithnjë e më të respektuar, gjithnjë e më të vlerësuar, gjithnjë e më të shpërblyer për atë që bëni për këtë vend! Dua t’i percjell një përqafim vëllazëror prindërve tuaj, bashkëshorteve, fëmijeve tuaj, motrave e vëllezërve tuaj, të cilët janë mbështetja juaj më e madhe, por janë edhe ata që më shume se sa askush e përjetojnë peshën e uniformës tuaj, për të cilen ju jeni gati të vini në rrezik edhe vetë jetën tuaj! Përgëzime”, deklaroi Balla.
Policia e Vlorës parandaloi një ngjarje kriminale, përmes arrestimit të Fatjon Gjonaj dhe Ergys Gjonaj, përkatësisht 33 dhe 19 vjeç të cilëve në makinë iu gjetën 2 mina me telekomandë të programuara për shpërthim në distancë.
