Paralizohet peshkimi në Durrës

Prej dy ditësh sektori i peshkimit në Durrës është i paralizuar. Mbi 70 anije të flotës së peshkimit, nuk janë lejuar të dalin në det për të ushtruar aktivitetin e përditshëm të peshkimit. Shkak mësohet të jetë bërë mosfunksionimi i sistemit “Blue Box”, me anë të të cilit qendra operacionale detare kryen monitorimin e mjeteve lundruese. Kjo nuk është hera e parë që peshkarexhat e Durrësit bllokohen në aktivitetin e tyre. Sipas peshkatarëve, një pjesë e mirë e anijeve e kanë në funksion të plotë sistemin, por për arsye të paqarta nuk janë lejuar të ushtrojnë aktivitetin. Jashtë kamerave peshkatarët dhe pronarët e peshkarexhave shprehen se ky është problem i sajuar nga ana e firmës sllovene, e cila fitoi tenderin për vendosjen e sistemit. Sektori i peshkimit është ndër më të rëndësishmit në Durrës, pasi përveçse furnizon me prodhime deti tregun vendas ka afro 500 te punësuar.