Pas përfundimit të mbledhjes së këshillit të mandateve për ish-ministrin Tahiri, Prokuroria për Krime te Renda vuri alarmin se nxjerrja e sekretit hetimor vë në rrezik serioz persona që kanë dijeni për hetimin.
Sipas organit të akuzës dijenia për grupin e strukturuar kriminal e me rrezikshmëri të lartë shoqërore intimidon e cenon integritetin fizik të këtyre personave.
Në njoftimin të shpërndarë për mediat prokuroria shkruan se disa nga personat në hetim janë në kërkim.
Ata qëndrojnë të fshehur dhe rezulton se ende nuk ka asnjë rezultat për kapjen dhe vënien e tyre para përgjegjësisë ligjore, e për këtë arsye, thotë organi i akuzës ata përbëjnë rrezik serioz për jetën e personave që kanë dijeni për veprën penale.
