Papa Françesku nga spitali: Tani që jam sëmurë, lufta më duket edhe më absurde

Papa Françesku, nga spitali Agostino Gemelli në Romë, ku ndodhet i shtruar që prej 14 shkurtit për shkak të pneumonisë, vendosi t’i dërgojë një letër gazetës milaneze Corriere della Sera në të cilën i referohet domosdoshmërisë që të mbizotërojë paqja dhe çarmatimi.

“Ne duhet të çarmatosim mendjet tona dhe tokën”.

“Ka shumë nevojë për reflektim, një ndjenjë kompleksiteti, moderim”, shkruan ndër të tjera Papa.

“Lufta shkatërron shoqëritë dhe mjedisin tonë, pa ofruar zgjidhje për konfliktet. Diplomacia dhe organizatat ndërkombëtare kanë nevojë për mbështetje dhe besueshmëri të re. Fetë, gjithashtu, mund të mbështeten në shpirtëroren e popujve për të ringjallur dëshirën për vëllazëri dhe drejtësi, shpresën për paqe”, shton Papa.

Në letrën e tij, Françesku thekson gjithashtu se “tani që është i sëmurë, lufta i duket edhe më absurde”.

“Kur ndihemi të brishtë, bëhemi më të qartë për atë që zgjat dhe çfarë është e përkohshme, për atë që jep jetë dhe çfarë vret”.

“Ndoshta kjo është arsyeja pse ne priremi të shmangim njerëzit e brishtë dhe të plagosur: ata kanë forcën e nevojshme për të vënë në dyshim drejtimin që kemi marrë, si individë dhe si grup njerëzor”, përfundon Papa./vizionplus.tv