Efektet e pandemisë në Kosovë kanë prekur ndjeshëm edhe mallrat e konsumit, duke reflektuar një rritje deri në vlerën 2.6 për qind, krahasuar me vitin e kaluar. Qytetarët e konsiderojnë të papërballueshëm këtë trend, në kushtet kur rrogat kanë pësuar rënie.
UKSHIN GASHI
QYTETAR
“Rrogat dihet qysh janë, çmimet janë të njëjta me Zvicër dhe Gjermani. Vetëm buka është lirë tek ne, të tjerat të gjitha janë njësoi sikur në Gjermani si në Zvicër”.
Ndërkohë kryetari i shoqatës për të drejtat e konsumatorëve, Selatin Kaccaniku e vlerëson të paarsyeshëm rritjen e çmimeve në kushtet e pandemisë.
SELATIN KAÇANIKU
KRYETAR, SHOQATA KONSUMATORI
“Në këto rrethana asnjë ngritje çmimi as për 0.1 përqind nuk mirëpritet dhe nuk arsyetohet. Prandaj, qeveria urgjentisht dhe me seriozitet maksimal duhet të reagojë… Ne si organizatë kemi bërë krahasim të rrogave në Kosovë me ato të Bashkimit Europian, derisa atje janë dhjetë herë më të larta rrogat, ne paguajmë të njëjtat çmime.”
Edhe kryetari i divizionit të statistikave të çmimeve në Agjencinë e Statistikave të Kosovës, konfirmon se prirja e rritjes nga muaji në muaj, thellohet.
IBISH ASLLANI
DIVIZIONI I STATISTIKAVE
“Sipas të dhënave që janë nxjerrë për muajin prill për çmimet e konsumit për ka dalë një ngritje e çmimeve për 0.3 përqind krahasuar me muajin mars të vitit 2021. Gati gjysma e të ardhurave shkon vetëm për konsum dhe kjo ndikon direkt në dobësimin e standardit të jetesës, por edhe të ekonomisë familjare në Kosovë.”
Sipas të dhënave nga Agjencia e Statistikave të Kosovës, edhe niveli i pagave, krahasuar me vitin 2020, ka pësuar rënie të ndjeshme.
