Pas me shume se 8 ore negociatash, përfaqësuesit e mazhorances dhe opozitës  nuk arritën te gjejnë konsensusin per aktet nënligjore te dekriminalizimit, por palët kane afruar qëndrimet e tyre dhe te premten pritet finalizimi i dokumentacionit. Negociatat nisen herët paradite e ka pasur momente kur u lajmërua arritja e kompromisit, per me tepër jane thirrur edhe anëtaret e Këshillit te Rregullores per te miratuar dokumentin konsensual, por vetëm pak minuta me pas gjithçka është kthyer mbrapsht e bisedimet kane rinisur. Negociatori i socialisteve Taulant Balla tha se nga PD pati keqinformime e ne lidhje me bisedimet.

Balla: Kemi rënë dakord për formularin. Kishim rënë dakord shumë më parë. Aktet nënligjore i mbyllim nesër në seancën plenare, duke respektuar germe për germë ligjin që na ka detyruar që brenda datës 6 të kemi aktet nënligjore. Nesër në Kuvend do të kemi zbardhur të gjithë dokumentacionin. Ajo që bëhet fjalë është për një vendim të Kuvendit dhe më pas për formularin e vetëdeklarimit. Këto çështje të mbyllen nesër. Nuk ka më negociata. Kemi rënë dakord për të gjitha dhe ajo që ka ngelur është që kërkohet një mendim mbi ato që është dakortësuar nga ana e PD. 

Mësohet se disa çështje te formularit te vetedeklarimit janë zgjidhur, por pika e fundit e hapur mbetet qartësimi i mekanizmit te verifikimit te rekordeve kriminale.

Bylykbashi: Janë çështje që kanë të bëjnë me mekanizmat që funksionon procesi i verifikimit. Pres që nesër të kemi një përmbyllje të procesit. Por mbeten të hapura çështje të tjera pezullimi me i ligj i deputetëve që plagosin apo vrasin, apo arrestohen në flagrancë dhe më pas rikthehen për të ushtruar funksionet publike. Ky është një kusht shumë i rëndësishëm që kemi ne.

Optimist u shpreh edhe kreu i Kuvendit, Ilir Meta i cili tha se gjithçka do te mbyllet paraditen e  se premtes.

Meta: Besoj se konsensusi është arritur dhe nëse ka ndonjë mendim për ndonjë çështje që s’është thelbësore, besoj që kemi kohë për ta përmbyllur këtë me sukses deri nesër paradite.

Aktet nënligjore te dekriminalizimit pritet te kalojnë fillimisht ne Këshillin e Rregullores e me pas per miratim ne seance e posaçme plenare, e cila u thirr nga kryetari Meta te premten ne orën 10.00.

 

Leave a Reply

Your email address will not be published. Required fields are marked *