Kryeministri Edi Rama tha këtë të premte se 49.122 persona kanë përfituar pagën e luftës nga paketa e dytë.
Teksa iu kthente përgjigje kërkesave të qytetarëve, kreu i qeverisë sqaroi se në total janë 250-260 mijë persona që janë paguar dhe do të vazhdojnë që të marrin pagën e luftës.
“Sa i përket pagës së luftës, nga paketa e dytë sot, tani që flasim janë 49.122 persona i kanë paratë në bankë dhe do të shkojë në 176 mijë pak a shumë. Në total jemi te 250-260 mijë persona që janë paguar dhe do të paguhen. Dëgjoj këta të Balona Tabakes që flasin, me aritmetikën e tyre Shqipëria na shkon se ka nja 5 mln banorë”, tha Rama.
Sa i përket shtimit të numrit të testeve për COVID-19, Rama shpjegoi se ekziton një strategji, e cila është diskutuar edhe me ekspertë gjermanë.
“Edhe dje në diskutimin me ekspertët gjermanë, por edhe me ekspertë të tjerë, kemi konfirmuar plotësisht nga biseda se ne kemi strategjinë e duhur. Gjermania nuk teston persona asimptomatikë, nuk nxjerrë tamponët rrugëve, por ka të njëjtin sistem dhe ndjek gjurmët, siç bëjmë edhe ne. I bie që populli të bëjë testin cdo ditë, por nuk funksionon kështu, është një idiotësi një interpretim i tillë. OBSH thotë testo, testo, testo, kontakte, jo bëjë tamponë në ajër.”
